電動輪椅 · 港鐵 · 巴士 · 的士 · 2026 最新
電動輪椅搭港鐵、巴士、的士：
2026 年港鐵新規之後要知啲乜？
港鐵由 2026 年 1 月 1 日起禁止攜帶電動可移動工具，好多用家擔心電動輪椅會唔會俾人截停。 以下用官方資料，加上輪椅王客人最常遇到嘅問題，一次講清楚港鐵、巴士、小巴同的士。
電動輪椅獲豁免
港鐵 120 × 70 cm、200 kg
兩蚊兩折
30 秒重點
最後更新：2026 年 11 月 9 日｜所有交通規定均附官方或機構來源
| 交通工具 | 電動輪椅上唔上到？ | 要留意 |
|---|---|---|
| 港鐵 | 可以（獲豁免） | 120 × 70 cm、連人 200 kg；用升降機；可預約活動摺板 |
| 專營巴士 | 大部分可以 | 請司機先降低車身再放斜板 |
| 專線小巴 | 只有少數路線 | 低地台路線要先致電預約 |
| 的士 | 摺合款放車尾；或預約無障礙的士 | 椅背要摺得落；預約時講明電動輪椅 |
| 高鐵 | 可以 | 第 7 卡兩個輪椅位；出發前一日致電 2120 0888 |
| 渡輪 | 大部分可以 | 大部分碼頭有升降機及斜道，下層較易到達 |
| 電車 | 有實際困難 | 月台同車廂窄，有高低差 |
一圖睇晒：電動輪椅搭港鐵、巴士、的士（可儲存轉發）
新規禁咗乜？電動輪椅受唔受影響？
港鐵由 2026 年 1 月 1 日起，禁止乘客攜帶電動可移動工具進入港鐵範圍， 例如電動單車、俗稱「風火輪」嘅電動單輪車、電動滑板車、電動平衡車、電動滑板同電動行李箱。
殘疾人士使用嘅電動輪椅獲豁免，可以照常搭港鐵。 不過電動輪椅都要符合港鐵嘅尺寸、重量同使用守則，下面逐項講。
示意圖：所有港鐵站都有活動摺板協助上落車
港鐵：電動輪椅要符合嘅 5 項守則
輪椅王出售嘅電動輪椅，尺寸都喺港鐵限制之內
只供有行動困難人士使用
港鐵寫明輪椅同電動輪椅只供有行動障礙或困難嘅人士使用。內燃機推動嘅行動輔助設備唔准進入。
帶備殘疾人士登記證
港鐵守則冇要求出示證明。不過如果有殘疾人士登記證，建議隨身帶備，用兩蚊兩折同免費乘車日都要用到。
最常見問題：前輪卡喺月台空隙
點解會卡？
電動輪椅前面嘅細轆好容易跌入月台同車廂之間嘅空隙，係輪椅王客人最常遇到嘅問題。有經驗嘅用家有自己一套入車廂方法，新手就建議先用活動摺板。
用「關愛共乘」App
港鐵官方 App「關愛共乘」（MTR · Care）可以預約活動摺板，亦可以睇實時升降機狀態同車站無障礙設施，出發前先查，唔使去到先發現升降機維修緊。
出發前記得用「關愛共乘」App
① 預約活動摺板 ② 查實時升降機狀態 ③ 睇車站無障礙設施
App Store 下載 ｜ Android 用家可喺 Google Play 搜尋「關愛共乘」
App 由港鐵公司提供，圖示版權屬港鐵公司；輪椅王同港鐵冇任何關係。
巴士同小巴
專營巴士
運輸署資料顯示，大約 99% 專營巴士可供輪椅上落（2024 年 9 月底），設有固定斜板同一至兩個輪椅位，輪椅位有靠背同安全帶。
溫馨提示：先降低車身
斜板太斜係另一個常見問題，通常係車身未降低。上車前可以有禮貌咁提醒司機先降低車身，再放斜板，上落會穩陣好多。
專線小巴
一般小巴有梯級，電動輪椅上唔到。只有少數低地台專線小巴路線可供輪椅上落，要先致電營辦商預約，路線見運輸署指南。
復康巴士
香港復康會營辦，車上有輪椅升降台同固定裝置，有定期路線同預約服務，要先登記。電話見下面嘅表。
示意圖：車身降低後，斜板會冇咁斜
的士：放車尾，定叫無障礙的士？
摺合款放普通的士車尾
摺合式電動輪椅一般放得入普通的士車尾，最緊要係椅背摺得落，摺到夠細先放得入。運輸署指南指，的士唔會因為輪椅另外收費。
連輪椅上車
唔方便轉移去座位嘅用家，可以預約可以連輪椅上車嘅車，例如部分的士車隊（例如星群的士）同鑽的。預約時講明係電動輪椅同大約尺寸。
| 服務 | 電話 | 備註 |
|---|---|---|
| 星群的士 | 3700 6500 | 接載輪椅使用者及照顧者 |
| 鑽的 | 2760 8771 | 接載輪椅使用者及照顧者 |
| 易達轎車（香港復康會） | 8106 6616 | 只服務輪椅使用者 |
| 復康巴士（香港復康會） | 2824 6500 WhatsApp 5691 0001 | 要先登記 |
| 易達巴士（香港復康會） | 2348 0608 | 要先成為會員 |
以上電話來自醫管局律敦治及鄧肇堅醫院「病人接載服務（自費）」清單（2026 年 5 月更新），輪椅王同以上機構冇任何關係。收費同安排以各機構為準，預約前請先致電確認。
示意圖：椅背摺得落，先放得入的士車尾
高鐵、電車同渡輪
高鐵
動感號第 7 卡有兩個輪椅位，可以喺購票時預留。建議出發前一日致電高鐵客務熱線 (852) 2120 0888 預約協助，名額先到先得。
渡輪
運輸署指南指，大部分碼頭有升降機同防滑斜道，大部分船隻有輪椅位，下層冇梯級，較易到達。上船前可以向職員查詢。
電車
電車月台同車廂都窄，上落位有高低差，運輸署指南指接載輪椅乘客有實際困難，電動輪椅用家建議改搭其他交通工具。
搭飛機
搭飛機涉及鋰電池同航空公司規定，比較複雜，可以睇我哋另一篇《帶電動輪椅去日本、台灣旅行》。
車費優惠：兩蚊兩折同免費乘車日
兩蚊兩折（2026 年 4 月 3 日起）
合資格殘疾人士用 $2 乘車優惠：車費 $10 或以下付 $2，超過 $10 付成人車費兩成。60 歲以下要用加註咗「殘疾人士身分」嘅個人八達通，60 歲或以上用樂悠咭。
殘疾人士免費乘搭車船日
每年國際復康日前後有一日，持殘疾人士登記證可以連 1 位照顧者免費搭港鐵、巴士、電車同指定渡輪。2026 年係 11 月 8 日，明年日期留意社聯公布。
經常搭公共交通，揀車要留意乜？
港鐵尺寸
輪椅王出售嘅電動輪椅，尺寸都喺港鐵 120 cm × 70 cm 限制之內。用家體重較重，記住連人總重唔可以超過 200 kg。
經常搭的士
揀椅背摺得落、摺埋夠細嘅摺合款，亦要計埋家人搬唔搬得起。可以嚟陳列室試摺，親手試吓放車尾嘅感覺。
常見問題
可以。港鐵由 2026 年 1 月 1 日起禁止攜帶電動單車、風火輪、電動滑板車、電動行李箱等電動可移動工具，殘疾人士使用嘅電動輪椅獲豁免。
不過電動輪椅要符合港鐵嘅尺寸同重量限制，並按港鐵乘車安全指引使用。
根據港鐵《乘車安全》小冊子（2026 年 1 月版），尺寸不可超過 120 cm（長）× 70 cm（闊），輪椅連使用者總重不可超過 200 kg。
行駛速度要相當於步行，上落各層要用客用升降機或輪椅升降台，唔可以用扶手電梯。
所有港鐵站都有活動摺板，可以向職員要求協助。亦可以用港鐵「關愛共乘」App 預先預約活動摺板，同埋出發前查睇升降機有冇維修。
專營巴士大部分設有固定斜板同輪椅位。如果車身未降低，斜板會比較斜，上車前可以有禮貌咁提醒司機先降低車身，再放斜板。
摺合式電動輪椅一般放得入普通的士車尾，最重要係椅背摺得落，摺得夠細。
唔方便轉移上座位嘅用家，可以預約可以連輪椅上車嘅車，例如部分的士車隊（例如星群的士）或鑽的，預約時講明係電動輪椅同大約尺寸。
合資格殘疾人士可以用 $2 乘車優惠。2026 年 4 月 3 日起改為「兩蚊兩折」：車費 $10 或以下付 $2，超過 $10 付成人車費兩成。
另外每年國際復康日前後有一日「殘疾人士免費乘搭車船日」，2026 年係 11 月 8 日，持殘疾人士登記證可連一名照顧者免費乘搭。資格以官方公布為準。
高鐵動感號第 7 卡有兩個輪椅位，可以喺購票時預留，建議出發前一日致電高鐵客務熱線 (852) 2120 0888 預約協助。
電車月台同車廂窄，有高低差，輪椅上落有實際困難。渡輪方面，大部分碼頭有升降機及斜道，大部分船隻有輪椅位，下層較易到達。
資料來源（查閱日期：2026 年 11 月 9 日）
1. 港鐵：《乘車安全》小冊子（2026 年 1 月）
2. 港鐵新聞稿：港鐵明年起禁止攜帶電動可移動工具進入鐵路處所（2025 年 12 月 23 日）
3. 港鐵：「關愛共乘」App
4. 運輸署：殘疾人士公共交通指南
5. 醫院管理局律敦治及鄧肇堅醫院：病人接載服務（自費）（2026 年 5 月更新）
6. 勞工及福利局：$2 乘車優惠計劃單張；星島日報：「兩蚊兩折」4 月 3 日實行（2026 年 3 月 23 日）
7. 港鐵高速鐵路：無障礙乘車指南
8. 香港社會服務聯會：2026 年國際復康日「殘疾人士免費乘搭車船日」使用說明
交通機構嘅規定可能會更新，出發前請以各機構最新公布為準。
想揀一部方便搭車嘅電動輪椅？
輪椅王喺香港經營輪椅及復康設備逾 16 年，團隊成員當中有註冊職業治療師、護士及註冊中醫， 熟悉唔同用家嘅身體狀況同日常出行需要。歡迎預約嚟陳列室試坐、試摺， 我哋會按你嘅身體情況，同埋平時搭港鐵、巴士定的士嘅習慣，建議啱用嘅型號。
